Mayor ng Bohol itinumba sa sabungan!
MANILA, Philippines — Patay ang alkalde ng isang bayan sa Bohol matapos siyang barilin sa ulo ng hindi nakikilalang tatlong suspek kahapon ng hapon sa loob ng kanyang sabungan sa Buenavista, nasabing lalawigan.
Binawian ng buhay habang ginagamot sa Dagohoy Hospital sa Inabanga, Bohol si Buenavista Mayor Ronald Tirol dahil sa tama ng punglo sa kanyang ulo.
Ayon kay Chief Inspector Rolly Lauron ng Buenavista Police, dakong alas-3:10 ng hapon nang barilin si Tirol sa loob ng Buenavista Cockpit Arena.
Sinabi ni Lauron na nasa labas ng sabungan at may ginagawa ang mga bodyguard ng alkalde nang maganap ang pamamaril ng tatlong gunmen.
Mabilis namang tumakas ang mga hindi nakikilalang suspek sakay ng motorsiklo.
Idinagdag pa ng opisyal na noong mga nakalipas na taon ay pinagtangkaan na rin ang buhay ni Tirol subalit nakaligtas siya sa tiyak na kamatayan.
Patuloy na nagsasagawa ng imbestigasyon ang pulisya at sinisilip ang anggulong politika na posibleng motibo sa pamamaslang sa alkalde.
- Latest
