Cook ng jail, 2 pa tiklo sa droga

LUCENA CITY  , Philippines  —  Kulungan ang binagsakan ng sinasabing tagapagluto sa Quezon Provincial Jail at dalawa niyang kasabwat makaraang maaktuhang nagbebenta ng ilegal na droga sa Brgy. 3, ng lungsod kamakalawa ng gabi. Sa ulat kay P/Supt.Vicente Cabatingan, chief of police dito, nakilala ang mga nadakip na sina Freddie Angeles, alyas Putik, 48, binata ng Tayabas City, Damaso Pondano, 38 ng Tiaong at Vicente del Mundo, ng Candelaria, Quezon. May isang buwan ding sumailalim sa surveillance ang mga suspek. Nang makumpirma ang kanilang transaksyon, ikinasa ng composite team ng Quezon City Drug Enforcement Unit (DEU) sa pamumuno ni P/Supt.Dennis de Leon ang buy bust operation dakong alas-7:40 ng gabi. Nakuha mula sa mga suspek ang 6 plastic sachet ng hinihinalang shabu na nasa 15.90 gramo na may street value na P50,000, ang P1,000 marked money at isang kulay berdeng Toyota Revo.