Trike sinalpok ng SUV: 1 patay

SAMAL, Bataan, Philippines — Namatay habang isinusugod sa ospital ang isang tricycle driver makaraang salpukin ng SUV na nawalan ng preno sa kahabaan ng Municipal Road ng Brgy. Gugo, Samal kamakalawa ng umaga.

Kinilala ni P/Sr. Insp. Michelle Gaviola, information officer ng Provincial Police Office  ang nasawi na si Jovito Gimena, nasa  hustong gulang, may-asawa at nakatira sa Brgy. Palili, Samal.

Sa ulat ng Samal Police, dakong alas-7:00 ng gabi habang mabilis na tinatahak ng Toyota Innova (PFI 274) na minamaneho ni Maria Gregoria delos Reyes, 63, nakatira sa 10 Nibong St., Brgy. East Calaguiman, Samal patungo sa direksyon ng Eastbound nang pagsapit sa junction ng Gugo ay nawalan umano ito ng preno kung kaya aksidenteng nabangga nito ang isang Mitsukoshi Daang Hari na may sidecar (BO50411) na minamaneho ni Jovito Gimena na nasugatan sa insidente.

 Sa pagkakabangga,  sumalpok sa puno ng santol ang tricycle hanggang sa nahagip sa banggaan ang isang lalaki na si Oscar Castaneda, 50, ng Barangay Gugo na naglalakad lamang sa kalsada.