Indian trader inutas ng tandem

BATAAN, Philippines — Napatay ang 22-anyos na Indian trader na sinasabing naningil ng pautang matapos itong tambangan ng riding-in-tandem assassins sa kahabaan ng Roman Highway sa Barangay Alas-Asin sa bayan ng Mariveles, Bataan kamakalawa umaga. Limang bala ng baril ang tumapos sa buhay ni Mahaver Singh, pansamantalang nakatira sa Barangay Mt. View sa nasabing bayan. Base sa police report, naningil ng pautang ang biktimang nagmomotorsiklo patungo sa nabanggit na barangay nang sundan at ratratin ng tandem gunmen dakong alas-10:20 ng umaga. Tinangay ng gunmen ang cellphone at P6,260 cash ng biktima bago tumakas patungo sa direksyon ng Balanga City.