Mag-asawa, anak patay sa killer kotse

TUGUEGARAO CITY, Cagayan, Philippines – Sinalubong ni kamatayan ang mag-asawa at anak nitong lalaki matapos salpukin ng rumaragasang kotse ang sinasakyan nilang traysikel sa Barangay 3, bayan ng San Nicolas, Ilocos Norte noong Linggo ng tanghali. ?

Sa ulat ni PO3 Elyzer Tuzon, hepe ng San Nicolas Traffic Division, kinilala ang mag-asawa na sina Eduardo Laguardia Sr., 33; Loreline Laguardia, 33; at ang anak na si Eduardo Laguardia Jr., 2.?

Naisugod pa sa Gov. Roque Ablan Sr. Memorial Hospital ang mag-anak subalit idineklarang patay.

Kritikal naman ang driver ng kotse na si Maximo Domingo, 57; at ang kasama nitong si Marlon Agodon, 36.

Lumalabas sa imbestigasyon na umagaw ng linya ng mag-overtake sa isa pang sasakyan ang kotse ni Domingo kaya nasalpok ang kasalubong na traysikel ng mga biktima.?

Sa lakas ng impact ay nagkapira-piraso ang traysikel matapos tumilapon ng ilang metro ang sakay nitong pamilya sa kalsada.

Total wreck naman ang kotse (TGF-342) kung saan kinailangang ilipat sa Mariano Marcos Memorial Hospital si Domingo dahil sa maselan nitong kalagayan.