Sekyu at magsasaka itinumba

BATANGAS, Philippines – Dalawang katao kabilang na ang isang sekyu at isang magsasaka ang binaril at napatay sa magkahiwalay na lugar sa Batangas City, kahapon.

Unang napatay ang sekyu na si Victor Basco, 40, security guard ng Mandarin Security Agency at residente ng Brgy. Sta. Clara, Batangas City matapos na makaalitan niya ang isang hindi pa kilalang vendor dakong alas-12:15 ng tanghali.

Nagpambuno ang dalawa hanggang sa maagaw ng vendor ang baril ng biktima at pinagbabaril ito sa dibdib na naging sanhi ng kanyang kamatayan.

Patay din ang 48-anyos na magsasaka na si Juan Magnaye matapos barilin ng kapwa niya magsasaka noong Martes ng gabi.

Nag-iinuman ang biktima at suspek na si Nilo Javier sa may Brgy. Sto. Domingo nang magkaroon ng pagtatalo nang biglang bumunot ng baril ang huli at binaril ang una sa katawan na agad nitong ikinasawi.