2 pinabulagta sa Cavite

CAVITE, Philippines – Pinabulagta ang dalawang lalaki matapos na pagbabarilin ng mga di-kilalang kalalakihan sa waiting shed sa Barangay Malagasang 1-D, Imus City, Cavite kahapon ng madaling araw. Kasalukuyang bineberipika ng pulisya ang pagkakakilanlan ng mga biktimang nakasandong itim, white short pants at may tattoo na bungo sa kanang braso at kaliwang kamay. Samantala, ang ikalawang biktima ay naka-puting tribal t-shirt at marron tribal na short pants, gray na cap at may tattoo rin ito sa dibdib. Sa imbestigasyon ni PO2 Jeremiah Baniasia, magkasamang nakatayo ang dalawa sa waiting shed nang lapitan at ratratin ng mga di-kilalang lalaki bandang alas-2 ng madaling araw. Pinaniniwalaang hindi nakatira sa nabanggit na barangay ang dalawa dahil walang nakakilalang mga residente. Narekober sa crime scene ang ilang basyo ng bala ng cal. 45 pistol.