Barangay konsehal utas sa ambush

LEGAZPI CITY, Albay, Philippines – Napatay ang 44-anyos na barangay konsehal na inakusahang tiktik ng militar matapos itong tambangan ng mga rebeldeng New People’s Army (NPA) sa kahabaan ng highway sa Barangay Bangon, bayan ng Lupi, Camarines Sur kamakalawa ng umaga. Base sa ulat ng pulisya na nakarating sa Camp Simeon Ola, nagmomotorsiklo ang biktimang si Konsehal Jose Auditor Jr. patungo sa Barangay Tagbak sa bayan ng Ragay nang pagbabarilin ng mga rebelde. Itinanggi naman na pamilya ng biktima ang akusasyon ng NPA rebs dahil sa pagiging opisyal ng barangay ay kailangan kaibigan ang mga sundalo at pulis na napapadako sa nasabing barangay.