Kagawad, tanod todas sa holdaper
LEGAZPI CITY, ALBAY, Philippines - Patay ang isang Brgy. Kagawad at kasama nitong tanod makaraang pagbabarilin ng hindi pa nakikilalang mga holdaper sa naganap na madugong robbery/holdup sa Sitio Riverside Matongaw, Brgy. San Jose, Cataingan, Masbate kamakalawa.
Kinilala ang mga biktima na sina Brgy. Kagawad Serafico Bedrejo Jr., 47-anyos, incumbent Brgy. Kagawad at Brgy. Tanod Edwin Dacay, 49; pawang residente sa Brgy. Matagangtang, Placer, Masbate.
Sa ulat ni Masbate Provincial Police Office (PPO) Director P/Sr. Supt. Jesus Martirez, dakong alas-11:30 ng umaga nang tambangan ng motorcycle riding-in-tandem ang mga biktima sa nasabing lugar.
Ang mga biktima ay binawian ng buhay sa tinamong mga tama ng bala ng M16 at M 14 rifle. Umaabot naman sa P100,000 ang natangay ng mga suspek sa mga biktima. Ang kaso ay patuloy na iniimbestigahan. (Ed Casulla)
- Latest
- Trending
