Matandang maglive-in partner kinatay

MANILA, Philippines - Karumal-dumal ang sinapit na kamatayan ng  matandang maglive-in partner na caretaker sa isang farm matapos pagsasaksakin at pagtatagain na halos ikaputol ng kanilang mga ulo sa naganap na krimen sa Purok Sinait, Dagatkidavao, Valencia City, Bukidnon, ayon sa opisyal kahapon.

Sinabi ni Inspector Jiselle Longakit, spokesperson ng Bukidnon Police, dakong alas-8 ng umaga nitong Biyernes Santo nang madiskubre ang bangkay ng mga biktima sa kanilang kubo sa farm ng negosyanteng si Robert Donato na kanilang binabantayan.

Kinilala ang nasawing mga biktima na sina Modesto Man-okil, 80-anyos at ang matandang babae na tinukoy lamang sa pangalang Perfecta, tinatayang nasa 80-anyos na rin ang edad.

Ayon sa pahayag ng ilang mga residenteng naninirahan sa bukana ng  nasabing farm, tatlong motorsiklo na sinasakyan ng hindi pa nakikilalang mga kalalakihan ang nakita nilang lumabas sa gate ilang oras bago nadiskubre ang krimen.

Pinaniniwalaan namang pagnanakaw ang motibo ng pamamaslang sa dalawang matanda habang patuloy ang masusing imbestigasyon sa kasong ito. (Joy Cantos)