2 kidnaper utas sa shootout
MANILA, Philippines – Napaslang ang dalawang kidnaper na miyembro ng Abu Sayyaf Group matapos ang matagumpay na operasyon ng mga awtoridad kung saan nasagip ang isang negosyante sa Malamawi Island, Isabela City, Basilan kamakalawa ng gabi.
Kinilala ni Captain Rowena Muyuela, spokesperson ng Army’s regional command ang nasagip na negosyante na si Ramon Sanson, may-ari ng convenience store na nagba-buy and sell ng kopra.
Bandang alas-6:30 ng gabi nang dukutin ng mga armadong kalalakihang naka-uniporme ng pulis ang biktima sa bahay nito sa Barangay Sta. Barbara.
Agad namang rumesponde ang pinagsanib na elemento ng PNP-Special Action Force at miyembro ng Cafgu kung saan sumiklab ang bakbakan.
Habang itinatakas ang biktima na kinakaladkad pasakay sana sa pumpboat ay nataranta ang mga kidnaper sa putukan kung saan tinulungan naman ng mga opisyal ng barangay ang biktima na makatakas.
Sa palitan ng putok na tumagal ng mahigit dalawang minuto ay dalawa sa mga kidnaper ang napatay habang nakatakas naman ang iba sa mga kasamahan nito.
Nagsasagawa na ngayon ng hot pursuit operations ang pinagsanib na elemento ng pulisya at militar laban sa grupo ng mga kidnaper na responsable sa insidente.
- Latest
