Bangkay ng lalaki isinako

SOLANO, Nueva Vizcaya, Philippines – Isang naaagnas na bangkay ng isang lalaki na nasa sako ang natagpuang palutang-lutang sa Magat River sa Barangay Baretbet, bayan ng Bagabag, Nueva Vizcaya kamakalawa ng hapon. Ayon kay P/Chief Insp. Claveria Villegas, hepe ng Bagabag PNP, ang bangkay ay natagpuan ng magkapatid na Ringor dakong ala-1 ng hapon. Sa pag-aakalang basura ang nasa sako ay dinala sa pampang habang na­ngingisda ang mag-utol subalit nang buksan ay lumantad ang naagnas na bangkay ng  lalaki. Tinatayang nasa 30 hanggang 40 ang edad ng biktima na may taas na 5’7” at walang anumang saplot sa katawan. Kahapon ay agad na inilibing ang biktima dahil sa masangsang na amoy kung saan naniniwala ang pulisya na pinatay sa ibang lugar ang biktima saka itinapon sa nasabing lugar upang iligaw ang imbestigasyon. Victor Martin