Mananare sa sabungan, pinabulagta

BULACAN, Philippines – Napatay ang 52-anyos na mananare sa sabungan matapos itong pagbabarilin ng di-kilalang lalaki sa harap ng drug store sa Barangay Poblacion, bayan ng Pulilan, Bulacan kamakalawa ng gabi. Limang tama ng bala ng cal .45 pistol ang tumapos sa buhay ni Francisco Esguerra ng Barangay Pungo sa bayan ng Calumpit, Bulacan. Sa imbestigasyon ng pulisya, may hinihintay na kaibigan ang biktimang nakaupo sa gilid ng drug store nang lapitan at ratratin ng di-kilalang lalaki. Kaagad na tumakas ang gunman lulan ng motorsiklo habang patuloy naman ang imbestigasyon.