Katiwala sa farm, itinumba

BULACAN, Philippines – Pinabulagta ang 33-anyos na katiwala sa mga sasabunging manok matapos itong pagbabarilin ng motorcycle-riding gunmen sa harap ng kanyang anak sa Barangay Tabang, bayan  ng Plaridel, Bulacan kahapon ng umaga. Dalawang tama ng bala ng cal.45 pistol ang tumapos sa buhay ni Victor Gonzales ng Rolan Lopez Farm sa Sitio Bagong Sikat sa nasabing barangay. Sa imbestigasyon ni PO1 George Ancheta, nakikipag-usap ang biktima sa kanyang anak nang lapitan at pagbabarilin ng di-kilalang lalaki. Narekober ng mga tauhan ng Scene of the Crime Operatives (SOCO) ang dalawang basyo ng bala ng cal. 45 pistol habang patuloy ang pagsisiyasat.