Hindi napautang… 2 anak hinostage ng ina
BULACAN, Philippines – Dahil hindi agad napahiram ng pera, hinostage ng isang 41-anyos na ginang ang dalawa nitong anak sa loob ng kanilang bahay sa Brgy. Narra, San Jose Del Monte City, Bulacan kamakalawa ng umaga.
Nahaharap sa patung-patong na kaso ang suspek na si Carla Resulto, residente ng Phase R, Francisco Homes, Brgy. Narra sa naturang lugar habang sumasailalim naman ngayon sa debriefing ng pulisya at City Social Welfare and Development ang mga nasagip na biktimang sina Sunshine Campollo 12 at kuya nitong si John Campollo 18 kapwa residente rin ng naturang lugar.
Base sa imbestigasyon ng pulisya, dakong alas 8:00 ng umaga ay kinausap ng suspek ang kanyang inang si Perlita Resulto para manghiram ng hindi pa nabatid na halaga ng pera ngunit tinanggihan ito ng ina na naging dahilan ng galit kaya pumasok sa loob ng kuwarto ng kanyang mga anak ang suspek at sinabihang papatayin ang mga ito gamit ang hindi nabatid na patalim.
Gayunman, dahil sa maayos na pakikipagnegosasyon ng pulisya ay napasuko nito ang nagwawalang suspek at napakawalan ang mga biktima.
- Latest
