Lasalista utas sa road mishap

CAVITE, Philippines – Patay ang  21-anyos na estudyante matapos itong maipit sa loob ng van na sumalpok sa pader ng bahay sa kahabaan ng Don P. Campos Avenue sa  Barangay Sabang, Dasmariñas City, Cavite kahapon. Idineklarang patay sa UMC Hospital ang biktimang si Dean Meryll Abadin na may kursong BS HRM, ng Townsville Subd. sa nasabing lungsod habang kakasuhan naman ang nagmamaneho ng van na si John Patrick Cantada, 20, kapwa estudyante sa La Salle na may kursong BS IT. Sa police report na nakarating sa Camp Pantaleon Garcia, magkasama sina Abadin at Cantada sa Toyota Innova (TUQ 694) nang sumalpok sa sementadong pader ng bahay pagsapit sa kurbadang kalsada. Naipit ang biktima sa loob ng sasakyan kung saan napuruhan ito sa ulo kaya nahirapang alisin ng mga tauhan ng rescue team.