Trabahador nilamon ng makina

CAVITE , Philippines  — Kamatayan ang sumalubong sa 24-anyos na trabahador ng pabrika makaraang maipit ang katawan nito sa makina kamakalawa ng umaga sa Trece Martires City, Cavite. Hindi na umabot ng buhay sa M.V. Santiago Medical Center ang biktimang si Jonrel Bilar, nakatira sa Barangay Mataas-na-Lupa, bayan ng Indang, Cavite at production adjuster sa Somico Steel Mill Corp. sa Ba­rangay Aguado. Base sa police report, namataan ng isa sa trabahador na si Dennis Adriano na nakahiga ang biktima kung saan inakala­ nito na natutulog lamang. Nang usisain ay bumulaga sa kanya ang duguang katawan ng biktima na sinasabing naipit sa gilingan ng bakal sa loob ng na­sabing pabrika. Kaagad na ipinagbigay-alam sa pulisya ang naganap na insidente.