Bunso kinatay ng kuya

CAMP SIMEON OLA, Legazpi City, Philippines – Napatay ang 31-anyos na mister matapos itong pagtatagain ng kanyang kapatid na lalaki habang nanonood ng laban ni Pacman sa panibagong karahasang naganap sa Barangay Comun, bayan ng Malinao, Albay kamakalawa ng hapon. Namatay habang ginagamot sa Ziga Memorial District Hospital ang biktimang si Rolando Samper habang sumuko naman sa pulisya ang suspek na si Ireneo Samper Jr., 43 , kapwa nakatira sa nabanggit na barangay. Sa ulat ng pulisya, nanonood ng laban ni Pacman ang biktima sa bahay ng kanyang kaibigan nang dumating at pagtatagain ng suspek na lango sa alak. Nagpulasan naman ang mga nanonood ng boksing dahil sa matinding takot na madamay sa away ng mag-utol. Pinaniniwalaang nag-away ang mag-utol sa minanang lupaing ipinama ng kanilang mga magulang.