“Munting Pangarap” sa 400 pamilya

CAVITE , Philippines   â€“ Sa tulong ng pribadong sector tulad ng P.A. Alvarez Properties and Development Corp. ay tuluyang lumikas ang 400 pamilya mula sa mapanganib na lugar para magkaroon ng sariling tahanan sa Sitio Kubuhan, Barangay Paliparan 2, Dasmariñas City, Cavite.

Bukod sa tulong pinansiyal para sa pagsasaayos ng kanilang paglipat sa bagong tahanan, sumailalim sa Community Mortgage Program (CMP) ng pabahay ang mga apektadong informal settlers kung saan sinuportahan naman ng nasabing developer katuwang ang Socialized Housing Finance Corp.

Itinatag din ng samahang Rennaisance Homes Homeowners Association upang maging legal ang kanilang pagmamay-ari sa lupaing kanilang kina-titirikan.

Bagama’t hindi naging madali ang proseso sa pagpapatupad ng programa dahil may ilang informal settlers ang nagpahayag ng kanilang pagtanggi, naisakatuparan din ang modelong pabahay.

Nabatid kay Rizza Montecalvo, isa sa nangangasiwa sa programang CMP, binigyan ng 30 metro kuwadradong lupa ang naapektuhang pamilya kung saan kanilang huhulugan ng P400 kada buwan.

“Mabuti na itong nangyari, kaysa naman laging may nakaumang na panganib na bigla na lang kaming paa-alisin dito,” pahayag ni Imelda Gerona, opisyal ng naturang samahan.