Kawani ng CAMD, kinidnap

Manila, Philippines - Dinukot ng tatlong armadong kalalakihan ang 25-anyos na kawani ng micro finance center sa bayan ng Patikul, Sulu kamakalawa. Kinilala ni Lt Col. Randolph Cabangbang ang biktima na si Rania Mohammad Suaso, dalaga, kawani ng Center for Agriculture and Moral Development (CAMD), at nakatira sa Martires Street sa Barangay Bangkal. Base sa ulat, ang pagdukot kay Suaso ay naganap dakong alas-8:10 ng umaga sa bisinidad ng Barangay Liang sa nabanggit na bayan. Ang biktima ay isinakay ng mga kidnaper sa pulang Tamaraw jeepney na hindi nakuha ang plaka. Hindi pa matukoy ang grupo ng mga kidnaper na sinasabing lugar na pinamumugaran ng mga bandidong Abu Sayyaf Group na may hawak pang ilang mga bihag.