2 katao pisak sa tren

Manila, Philippines -  Dalawa katao ang nasawi makaraang aksidenteng masagasaan ng rumaragasang tren ng Philippine National Railways (PNR) sa Zone 5, Brgy. Apali, Ragay, Camarines Sur kahapon ng mada­ling-araw.

Kapwa dead-on-the-spot sa insidente matapos magulungan at makaladkad pa ng tren ang katawan  ng mga biktimang sina Jeffrey Carpo, 22 at Benny Tatodo, 23; pawang residente ng Brgy. Agropacion ng bayang ito.

Batay sa imbestigasyon, sinabi ni Chief Inspector Canuel ng Ragay Municipal Police Station (MPS), naganap ang malagim na sakuna sa nasabing riles ng tren pasado alas-3:30 ng mada­ling-araw.

Pinaniniwalaan namang kapwa lasing ang dalawang biktima ng mapalupasay sa riles at posible rin umanong naidlip kung saan ay hindi na nagawang iwasan ang paparating na killer tren na biyaheng Manila- Naga.

Sa tala ng pulisya, aabot na sa walo katao ang mga nasawi sa loob lamang ng tatlong linggo matapos masagasaan ng tren sa lalawigan ng Camarines Sur.

Magugunita na noong Hunyo 22 ng taong ito ay lima katao na karamihan ay mga estudyante ang nasawi habang pito naman ang na­sugatan  matapos na mahagip ng tren ang sinasakyan ng mga itong tricycle sa riles ng Iriga City ng lalawigan.

Nabatid na kinalampag na rin ng lokal na pamahalaan ang PNR na makipagtulu­ngan sa paglalagay ng mga ‘warning signals’ sa mga ‘railroad crossing’ dahilan sa nakakaalarmang paglobo ng bilang ng mga biktimang nasasagasaan ng tren.