Babaerong pulis buking sa Facebook
MANILA, Philippines - Dahil sa social networking site na Facebook, nabuking ng misis ang pangangaliwa ng kaniyang mister na pulis na isa ring criminology instructor sa Cebu.
Sa ulat na nakarating kahapon sa Camp Crame, sinabi ng nagdurusang misis na itinago sa pangalang Melissa, nadiskubre niya ang pagtataksil ng kaniyang mister na may ranggong PO3 na sinasabing isa sa mga bodyguard ni Cebu Governor Gwendolyn Garcia at miyembro rin ng Provincial Public Safety Company ng Cebu Provincial Police Office nang makita sa facebook ang isa pang account ng kaniyang mister.
Sinasabing ipinakikilala ng kaniyang mister ang kalaguyo nito na itinago naman sa pangalang Anabelle na siya ang misis ng taksil niyang mister.
Natuklasan din ng misis na may isa nang anak na batang babae ang kaniyang asawa sa kalaguyo nito.
Tiniyak naman ni Atty. Augusto Macam, abogado ni Melissa na uusad ang reklamong inihain sa CPPO-Provincial Investigation and Detective Management Branch laban sa kaniyang mister.
Sinabi naman ni PO1 Yolanda Kyamko, pre-charge evaluator ng PIDMB na kabilang sa reklamong inihain ni Melissa ay ang hindi pagbibigay ng sapat na suporta ng asawa sa kanyang pamilya at kung magbigay ay P300 hanggang P800 lamang kada payday.
Isinalaysay din ni Melissa ang pagkakaroon ng anak sa iba pang babae ng kanyang mister.
Dahil dito, positibo si Atty. Macam na makasuhan din ang mister ni Melissa sa paglabag sa Republic Act 9262 (Anti-Violence Against Women and Children Law) at kasong concubinage.
- Latest
- Trending