Trader itinumba sa kalsada

NUEVA ECIJA, Philippines  – Brutal na kamatayan ang sinapit ng isang 45-anyos na negosyante na pinagbabaril ng mga di-kilalang armadong lalaki ay nasagasaan pa ng sasakyan sa gitna ng kalsada sa Gov. Joson Road, Barangay Poblacion sa bayan ng San Isidro, Nueva Ecija kamakalawa ng madaling araw.

Kinilala ng pulisya ang napaslang na si Rommel Paez y Alejo, 45, ng Intramuros Street, Barangay Poblacion, at dealer ng day old chick.

Sa imbestigasyon, dakong alas-3 ng madaling araw noong Biyernes ay nagdyaging ang biktima kung saan nakarating sa terminal ng mga traysikel malapit sa Pamilihang Bayan ng San Isidro sa Barangay Poblacion.

 Ilang minuto ang nakalipas malapit sa nasabing terminal ay umalingawngaw tatlong putok ng baril kung saan duguang bumulagta ang ang biktima na hawak pa ang kanyang cell phone.

Hindi naman napansin ng drayber ng pampasaherong jeepney ang nakabulagtang biktima kaya ito nasagasaan.