4 snatcher, timbog

KAMPO ALEJO SANTOS, Malolos City, Philippines  — Apat na hinihinalang notoryus na snatcher kabilang ang isang babae ang nasakote ng pulisya matapos mambiktima ng tatlo katao, dalawa rito ay estudyante sa lungsod na ito. Kinilala ni Provincial Director P/Sr.Supt. Fernando Men­dez, Jr. ang mga suspek na sina Jellgred Uy 21, Rommel Manreza, 22, kapwa nakatira sa Brgy. Loma De Gato sa bayan ng Marilao, Bernadeth Serrano 28, ng Brgy. Ma­kabot, Montalban, Rizal at Mariano Magdaraog, 33, ng Brgy. Lolomboy sa bayan ng Bocaue. Ang mga ito ay dinakip matapos na ireklamo ng kanilang mga nabiktima na sina Jeppe Campos 22, factory worker, Marita Marcelino 17, estudyante at Russmond Villafuerte, 19, estudyante ng Brgy. Biñang sa bayan ng Bocaue na hinablutan ng mga ito ng mga kagamitan kabilang ang mga mamahaling cell phone at alahas.