3 patay, 7 sugatan sa killer truck
CAVITE, Philippines – Tatlo-katao ang iniulat na namatay samantalang pitong iba pa ang sugatan matapos suyurin ng trailer truck ang mga sasakyan sa gilid ng highway sa bayan ng Alfonso, Cavite kamakalawa ng hapon.
Kabilang sa mga nasawi ay sina Enuario Rom, 68; Michael Lolor, 20; at Nick Dollete, 47, kapwa pahinante at nakatira sa bayan ng General Trias, Cavite.
Naisugod sa Dr. Poblete Memorial Hospital ang mga sugatang pahinante na sina Randy Suason, Nepthalie Guinipapa, Albert Aurelia, Lugie Basas, Eduardo, Anselmo, Marvin Acuzar at ang truck driver na si Robert Calaranan.
Ayon kay P/Chief Insp. Egbert Tibayan, binabagtas ng trailer truck (ZHS454) ni Calaranan ang kahabaan ng highway sa Barangay Kaytitinga nang mawalan ito ng kontrol at araruhin ang mga nakaparadang sasakyan sa gilid ng kalsada bandang ala-una ng hapon.
Naipit si Rom habang namatay din sina Lolor at Dollete matapos tumilapon ng ilang metro.
- Latest
- Trending
