'Week of mourning' idineklara sa Bacolod

BACOLOD CITY, Philippines – Ka­salukuyang nagdadalamhati ang taumbayan sa pagka­matay ng labimpitong si­bilyan sa naganap na sunog sa dalawang komunidad noong Lunes ng madaling-araw kung saan naabo ang may 59 kabahayan sa Ba­rangay 19 sa Bacolod City.

Sa inisyung executive order ni Mayor Evelio Leo­nardia, idineklarang san­linggong pagluluksa (week of mourning) simula Nob­yembre 2 hanggang 8 kung saan hinikayat ang mga Bacolenos na tumulong sa mga biktima ng trahedya.

Samantala, kinumpirma naman ni Fire chief Pamela Rojane Candido ang ika-17 bangkay na narekober sa sunog na si Annavic Celiz Ca­bajosa kung saan na­unang iniulat na nawawala.

Kabilang sa mga natusta sa sunog ay ang asawa ni Annavic na si Joselito, 28; mga anak na sina Carl Jo­ shua, 3; Analyn, 7; at Adah Pauline, 6; mag-utol na No­vie, 12; at BeeG, 6; Chavez, Josephine Nino, 42; Jo­velyn, 14; Ruel, 13 at ang 11-bu­wang apo ni Nino na si Rose­marie; boat janitor Junifer Demandar, 45; asa­wang manicurist na si Je­nalyn at anak na si Joshua, 10; Nica Amelda, 25; Eduar­da Abajero, 70; at si Napoleon, 40. 

Narekober ang sunog na mga katawan sa boarding house na pag-aari ni Margie Depakakibo kung saan sinasabing nagmula ang apoy.

Umaabot naman sa P4 milyong halaga ng ari-arian ang naabo sa naganap na sunog na nagsimula ban­dang alauna ng madaling-araw bago naapula dakong alas-4 ng madaling-araw kung saan 80 pamilyang naapektuhan ay nasa ba­rangay multi-purpose center.         

Sa panayam ng Aksyon Radyo kay fire officer Cor­nelio Silva, isa sa boarder na si Gloria Abrigo na sinasa­bing umigib ng tubig sa ba­lon ay nakalimutang patayin ang kandila na may sindi kung saan sinasabing na­tum­ba at nagsimulang kuma­lat ang apoy. Antonieta Lopez