Pamilya minasaker

MANILA, Philippines - Apat na miyembro ng isang pamilya ang nasawi habang pinaniniwalaan namang iniligtas ng kani­lang anghel dela guwar­diya ang isang pitong bu­wang sanggol at kapatid nitong paslit matapos na pag­babarilin ng mga arma­dong kalalakihan sa Ba­rangay 14 Ester, Vintar, Ilocos Norte kamakalawa ng gabi.

Kinilala ni Ilocos Norte Police Officer–in-Charge Sr. Supt. Benjamin Lusad ang mga biktima na sina Ama­dor Castro, asawa nitong si Marciana, at anak nilang sina Mercy at Reymalin.

Ikinulong naman ng mga suspect sa isa pang ku­warto ang dalawa pang bata na isang anim na taong gulang at pitong buwang sanggol na anak ni Marciana na kapwa naka­ligtas sa insidente.

Sinabi ni Lusad sa isang panayam sa telepono na nadiskubre ang krimen dakong alas-6:00 ng uma­ga kahapon matapos na mag-usyoso ang mga ka­pitbahay ng mag-asawa sa kanilang tahanan.

Ayon kay Lusad, nasa kalaliman na ng gabi ha­bang mahimbing na natu­tulog ang mga kapitbahay ng mag-asawa nang maka­rinig ang mga ito ng sunud-sunod na putok ng baril na nanggaling sa tahanan ng mga biktima.

Kinabukasan ay agad na sinilip ng mga kapit­ba­hay ng mag-asawa ang ta­hanan ng mga ito at dito na unang bumungad ang bangkay ni Amador na na­kagapos pa ang dalawang kamay at may plaster pa ang bunganga.

Natagpuan namang tad­tad ng tama ng bala ang mag-iinang sina Marciana, Mercy at Reymalin sa loob ng isang kuwarto sa kani­lang bahay.

Nakuha ng mga nagres­pondeng awtoridad ang isang cal . 22 at 9 MM pistol na siyang ginamit sa krimen.

Kinumpirma ni Lusad na naaresto na nila ang isa sa mga suspek na tumanggi muna nitong kilalanin upang hindi mabulilyaso ang kani­lang dragnet operation laban sa iba pang salarin.