2 golf course sa Cavite kinasuhan

Nalalagay sa balag ng alanganin ang pamunuan ng dalawang golf club sa Cavite na sinasabing patu­loy na ‘di-nagre-remit ng P5.5 milyong halaga mula sa Golfer’s Environmental Fee simula pa noong 2005 makaraang kasuhan ng syndicated estafa ng Provincial Trea­ surer’s Office.

Kasalukuyang nasa opisina ng provincial prosecutor ang kasong isinam­pa ng Provincial Trea­su­rer’s Office laban sa The Orchard Golf and Country Club sa bayan ng Das­mariñas at Eagle Ridge Golf and Country Club sa General Trias.

Napag-alamang naka­ko­lekta ang Orchard ng P4,476,260 ng Golfer’s Environmental Fees noong Pebrero 2005 hanggang Disyembre 2007, saman­talang ang Eagle Ridge naman ay nakakolekta ng P1,070,660 noong Abril 2006 - Disyembre 2007.

Ang nasabing bayarin ay nakasaad sa Provincial Tax Ordinance No. 2004-001 (2004 Revised Revenue Code of the Province of Cavite) subalit kinu­westyon ng dalawang golf club at naghain ng petisyon sa Department of Justice noong Abril 2005, at sa regional trial court.

Bagamat tinututulan ang probisyon ng tax ordinance at kahit wala pang de­sisyon ang korte sa ka­nilang mga inihaing pe­tisyon, patuloy naman ang dalawang golf club sa paniningil na nasabing bayarin hanggang sa ka­salukuyan na hindi ipi­na­pasok sa kaban ng lala­wigan kaya kinasuhan ng Provincial Treasurer’s Office sa pangunguna ni Provincial Legal Officer Atty. Leilanie Grimares.