13 minero nalibing nang buhay sa tunnel

Labingtatlong minero ang iniulat na nakulong o nalibing nang buhay sa tunnel ng isang minahan ng ginto sa Purok 7, Gold Field Poblacion sa Itogon, Ben­guet kamakalawa ng gabi kasabay ng panana­lasa ng bagyong Nina sa lalawigan.

Batay sa report, dakong alas-7:30 ng gabi nang pu­masok ang mga pribadong minero ng Saranay Community Association sa pa­mumuno ng Pangulo nito na si Weiver Layaban sa tunnel.

Bunga nito, agad na bu­muo si Benguet Governor Nestor Fongwan ng search and rescue teams para sa pinaghahanap na 13 minero matapos na ma­tanggap ang ‘distress call’ dakong alas-4:00 ng ma­da­ling-araw ka­hapon.

Dahil sa malakas na pag­buhos ng ulan ay na­puno ng makapal na putik ang ‘portal entrance’ o unahang la­gusan ng mina­han na pi­na­sok ng nasa­bing mga mi­nero. Ang Ito­gon ay may 30 kilometro ang layo mula sa silangan ng lungsod ng Baguio City.

Ang nasabing mga mine­ro ay kabilang sa mga resi­dente sa lugar na na­apek­tuhan ng pananalasa ng bagyong Nina.

 Sa ulat na ipinarating sa Office of Civil Defense ni George Baywong ng Mines and Geosciences Bureau, nabigong makaba­lik sa ka­nilang mga taha­nan ang naturang mga mi­nero nitong Lunes ng gabi.

“Hindi pa natin mabatid kung buhay sila o patay na. Umaasa tayong meron pang air pocket sa kanilang kina­roroonan, sabi pa ni Bay­wong.

Pinaniniwalaan namang ang naturang mga minero ay na-trap sa tinatayang 400 hanggang 700 talam­pakang lalim sa nasabing minahan

Inamin kahapon ng Cordillera Provincial Police Office na hirap sila sa search and rescue operation sa 13 minero.

Ayon kay Cordillera Regional Police Office Director Chief Supt. Eugene Martin, ito’y sa dahilan ng malakas na agos ng tubig sa tunnel ng minahan.

Bukod dito ay maputik sa lugar bunga ng malala­kas na pag-ulan na dulot ng southwest monsoon rains na buntot ng bagyong Nina.

Kinilala ni Martin ang ilan sa mga minero na sina Joel Bolga, Gilbert Matin, Rudy Bulaing Jr., Marvin Himayod, Vincent Hima­yod, Rudy Hi­mayod, Robert Buay, Joseph Anayatan, Mario Ana­yatan at Jojo Himayod.

Samantala, umaabot naman sa tinatayang 90 mga kabahayan ang nata­bunan matapos na gumuho ang bundok sa naganap na landslide sa Itogon, Be­n­guet kahapon.

Batay sa report na naka­rating kahapon sa Office of Civil Defense bumigay uma­no ang lupa at tuluyang nila­mon ang mga kabahayan dito na sentro ng minahan sa lugar.

Ang insidente ay sanhi ng malalakas na pag-ulan na epekto ng bagyong Nina na nagpalambot sa lupa na tu­ mabon sa mga kabaha­yan.

Aabot naman sa mahigit 71 pamilya ang naapektu­han matapos na matabunan ng tinatayang 300 metro ng gumuhong lupa na may taas na 30 talampakan ang kanilang mga kabahayan sa Brgy. Loakan at Antamok.