November 2, 2007 | 12:00am
CAMP CRAME – Dahil sa ilang araw na buhos ng ulan ay lumubog sa tubig-baha ang mga sementeryo na nakaapekto sa paggunita ng Undas sa Iloilo City kahapon ng umaga. Bandang alas-2 ng madaling-araw kahapon nang magsimulang bumaha dulot ng mga baradong drainage system kung saan malaking bahagi ng lungsod kabilang ang mga sementeryo ang naapektuhan. Napag-alamang umapaw ang tubig sa Jaro River na nakaapekto sa mga Barangay Simon Ledesma, Tacas, Tabuc Suba, Democracia, Ungka, Sambag, Jaro na pawang nasa Iloilo City. Umabot sa hanggang tuhod ang tubig-baha sa mga apektadong barangay kung saan pansamantalang inilikas sa mga evacuation centers ang mga residente. Kaugnay nito, kaagad na kumilos ang local na ahensya ng Crisis Management Unit para tumulong sa mga apektadong pamilya sa posible pang pagtaas ng tubig partikular na sa distrito ng Barangay Jaro. (Joy Cantos)
Tanker hulog sa bangin
CAMP VICENTE LIM, Laguna – Isang drayber ng fuel tanker na nasakote ng mga awtoridad dahil sa pagnanakaw ng krudo ang iniulat na namatay samantalang dalawa pa ang nasugatan makaraang mahulog sa bangin ang sinasakyang truck sa Laguna sa bayan ng San Jose, Batangas kamakalawa ng umaga. Kinilala ni P/Senior Supt. David Quimio, Batangas police director, ang drayber na si Benerando David, 37, ng Kumintang Ibaba, Batangas City at kawani ng FMC trucking na pag-aari ni Francisco Castillo. Dinala naman sa San Jose District Hospital sina PO1 Edwin Castor, miyembro ng Criminal Investigation and Detection Group (CIDG) sa Region 4A at isang civilian agent na nakilalang si Rommel Piamonte. Napag-alamang naaresto ng CIDG ang drayber at mga pahinante ng truck matapos maaktuhang nag-papaihi (pilferage) ng kanilang 10-wheeler truck (DWH-141) sa may Mabini, Batangas. Nang pabalik na ang grupo ng CIDG sa Camp Vicente Lim, sa bayan ng Canlubang, Laguna, aksidenteng nahulog sa bangin ang truck pagsapit sa hangganan ng Barangay Banay-banay at Barangay Taysan, paglampas ng Malaking Ilog Bridge. (Arnell Ozaeta)
‘Nalong kagawad kinatay
CAMP SIMEON OLA, Legazpi City — Isang nanalong barangay kagawad ang dinukot bago pinaslang ng mga ’di-kilalang kalalakihan sa Barangay New Moriones, Ocampo Camarines Sur noong Lunes ng gabi (Oktubre 29). Ang bangkay ng biktima na natagpuang tadtad ng sugat ng itak sa buong katawan ay nakilalang si Ramon Comprador 57, ng nabanggit na barangay. Ayon sa ulat, dinukot ang biktima matapos na iproklama ito ng Comelec na panalo sa katatapos pa lamang na barangay at Sangguniang Kabataan elections. Sa follow-up operation ng pulisya, nasakote naman ang mga suspek na si Herberto Filipino, Roberto Filipino at Gervacio Racasag Jr. Mariin naman itinanggi ng mga suspek ang akusasyon laban sa kanila. (Ed Casulla)
