Holdaper natodas sa presinto

CAVITE — Binaril at napatay ang isang 27-anyos na lalaki na pinaniniwalaang notoryus na holdaper makaraang mang-agaw ng baril sa loob ng presinto ng pulisya sa bayan ng Dasmariñas, Cavite kahapon ng madaling-araw.

Bulagtang namatay si Bernardo Bugal ng Block 57 Lot 4 sa Barangay Sto. Cristo ng bayang nabanggit. Sa inisyal na imbestigasyon ni PO2 Edgar Belza, nasakote si Bugal sa kasong holdap at nang ipapasok sana sa selda ni PO3 Joel Palmares ay nakapang-agaw ng baril hanggang sa magpambuno ang dalawa.

Humingi naman ng saklolo si PO3 Palmares sa ibang kasamahang pulis at kaagad na rumesponde sina P/Chief Insp. Mario Reyes at SPO1 Rolando Vinzon upang tulungan si Palmares. Naaktuhan ni Reyes na babarilin na ni Bugal si Palmares, kaya inunahan na nitong putukan hanggang sa mapatay. (Cristina Timbang)