Bagets namaril sa party: 1 patay, 1 grabe

SAN ANTONIO, Quezon - Nabahiran ng dugo ang pagdaraos ng isang masayang birthday party ng isang negosyante makaraang manggulo ang isang kabataan sa pamamagitan ng pamamaril sa kanyang kaaway na nagresulta sa pagkamatay ng isa at malubhang pagkasugat sa isa pa sa Barangay Puri sa bayang ito, kamakalawa ng madaling araw.

Kinilala ng pulisya ang nasawing biktima na si Marvin Lopez, 20, samantalang nasa kritikal namang kondisyon sa Medical Center Hospital sa San Pablo City si Ramon Aguila, 20. Tinutugis ngayon ng mga awtoridad ang bumaril sa kanila na si Richard Ilao, 19, ng Barangay Puri.

Ayon sa isinagawang imbestigasyon , dakong alas-2:45 ng madaling araw ay nagkakasayahan ang mga biktima at ilan pang mga bisita sa compound ng bahay ni Mr. Ricardo Dimaano dahil sa kaarawan nito.

Ilang sandali pa ang lumipas ay bigla na lamang nagkagulo dahil sa pagdating ng suspect na armado ng baril at hinanap ang dalawang biktima dahil sa matagal na nilang alitan.

Nang makita ang target ay agad na pinaulanan ng bala ng baril ang mga ito at pagkatapos ay mabilis na itong tumakas. (Ulat ni Tony Sandoval)