Cagayan, Isabela nilumpo... 12 patay sa bagyong Lawin
MANILA, Philippines - Labindalawa katao ang naiulat na nasawi sa malakas na hagupit habang dalawa ang nawawala ng bagyong Lawin na nagdulot ng matinding delubyo sa Northern Luzon partikular na sa lalawigan ng Isabela at Cagayan.
Sinabi ni National Disaster Risk Reduction and Management Council (NDRRMC) Executive Director Ricardo Jalad, nakatanggap sila ng inisyal na report na 12 katao ang nasawi.
Inaasahan na ang matinding pinsalang idinulot ng bagyong Lawin partikular na sa Isabela at Cagayan na una nang isinailalim sa tropical cyclone signal number 5 sa kasagsagan nang pananalasa ng bagyo.
Sa ulat ng Cordillera Police, nasawi sa landslide sa lalawigan ng Ifugao ang mga biktimang sina Junior Chawagan,16; at Jeramel Alfaro, 17, habang sa Benguet ay sina Edgar Genese, 40; at Jonie Borja. Nawawala naman matapos na tangayin ng malakas na agos ng tubig baha sa Ifugao ang biktimang si Larry Duyapat.
Sa Benguet ay nasawi sa Sagpat, Kibungan dahil sa landslide sina Jhon Carlos Hatop; isang bagong silang na sanggol; Joshua Hella, 19; Jessie Hella, 28. Habang sa bayan ng Abatan, Buguias ay ang 65-anyos na si Arsenio Lantaen.
Kinumpirma naman ni Benito Ramos, dating NDRRMC Executive Director at kasalukuyang consultant ng ahensiya na sa kaniyang lalawigan sa Isabela ay dalawa ang napaulat na nasawi kabilang ang 70 anyos na si Jose Malinap nang atakehin sa puso sa evacuation center at isang CAFGU na si Marcos Cabaldo Bernardo, 47, na nabagsakan ng nabuwal na malaking punong kahoy.
Ang bagyong Lawin ay bumayo sa Northern at Central Luzon kung saan maraming nabuwal na mga punong kahoy at poste ng kuryente habang apektado rin ang linya ng komunikasyon sa hilagang bahagi ng lugar partikular na sa Cagayan, Isabela, Ilocos Region at CAR.
- Latest