Nang-agaw ng kanta, dinedo

MANILA, Philippines – Patay ang 27-anyos na lalaki makaraang saksakin ng isang construction worker na inagawan umano sa pagkanta ng poker face sa loob ng resto bar sa Binondo, Maynila, kahapon ng madaling araw.

Nagtamo ng 21-saksak sa  katawan ang biktimang si Romulo Ynazon ng #565 Valderama Street sa nasabing lugar. Nadakip naman ang suspek na si Edgar Pastrana, 26, stay-in sa itinatayong gusali sa Delpan, Binondo.

Sa ulat ni PO2 Dennis Turla ng Manila Police District-Homicide Section, naganap ang krimen sa A & J Videoke Bar sa San Miguel Road dakong alas-3: 30 ng madaling araw.

Sa imbestigasyon, nag-iisa sa lamesa ang biktima habang ang suspek ay may kasamang babae nang unahan ng biktima ang suspek sa pagkanta ng poker face na kakantahin sana ng suspek.

Dito na sinaksak ng suspek ang biktima bago tumakas.

Nagtaka pa ang mga tao sa videoke bar nang bumalik ang suspek na mistulang balisa at nagsasalita na naliligaw siya kaya nagkaroon ng pagkakataon ang mga tao na ituro siya sa mga pulis.