Mag-utol nalunod sa dagat
MANILA, Philippines – Isang magkapatid na lalaki ang nilamon ng dagat makaraang malunod ang mga ito habang nanghuhuli ng isda sa karagatan ng Brgy. Butuan, Aninniy, Antique kamakalawa.
Ang magkapatid na patuloy pang pinaghahanap ay kinilalang sina Riel Kurt, 14 at Rickson Inson, 12.
Batay sa ulat, ala-1:20 ng hapon ay nagkatuwaan ang magkapatid kasama ang tatlong kaklase na kinilalang sina Cyrus Magbanua, 14; Moises Sasi, 12 at Elmer John Niangar, 12 na manghuli ng isda.
Habang nanghuhuli ng isda ay biglang umalon ng malakas at tinangay ang mga ito dulot ng masamang lagay ng panahon sa karagatan.
Nasaksihan naman ng ilang residente na nagkataong nasa tabing dagat at sinaklolohan ang mga bata kung saan nailigtas ang tatlo maliban sa magkapatid na kapwa hindi umano marunong lumangoy na patuloy pang pinaghahanap.
- Latest