Ex-priest binoga

MANILA, Philippines - Pinagbabaril ang isang dating pari ng hindi pa nakilalang mga armadong kalalakihan sa bayan ng Maramag, Bukidnon kamakalawa.

Ang biktimang si Teresito Labastilla, 45, ay idineklarang dead-on-arrival sa pagamutan.

 Ayon sa pulisya naganap ang krimen sa harapan ng Maramag  Central Elementary School na matatagpuan sa kahabaan ng Dionisio Micayabas St., Brgy. North Poblacion sa nasabing bayan dakong alas-7:45 ng umaga.

 Sa imbestigasyon lumalabas na  kahahatid lamang ng biktima sa anak nitong lalaki sa nasabing eskuwelahan nang biglang sumulpot ang dalawang lalaking lulan ng motorsiklo.

 Agad pinaputukan ng backrider ng sunud-sunod ang biktima hanggang sa duguan itong mahandusay sa nasabing lugar.

 Nabatid na ang biktima ay dating Kura Paroko ng Simbahang Katoliko sa  Malaybalay City at San Fernando pero kumalas ito sa pagpapari matapos na umibig sa isang babaeng deboto sa simbahan.

 Samantalang tumakbo rin itong alkalde ng Lantapan noong 2013 local election pero natalo kay incumbent Mayor Godofredo Balansag.

 Patuloy naman ang isinasagawang imbestigasyon ng mga awtoridad  sa motibo ng krimen.