Iba’t ibang klaseng paputok kinumpiska sa Maynila

MANILA, Philippines - Muling sinalakay ng mga tauhan ng Manila Police District ang mga sidewalk vendor at kinumpiska ang iba’ ibang klaseng paputok kahapon ng hapon sa Binondo, Manila.

Ayon kay P/Supt. Julius Anonuevo, Station Commander ng MPD-Binondo Police Station 11 ang sorpresang pagsa­lakay sa mga tindahan ng paputok sa M. De Santos St. sa Sto Cristo sakop ng Binondo at nakumpiska ang daang daang paputok tulad ng Plapla; bawang; whistle bomb; Piccolo; kwitis at fountain. 

Sa ulat ng pulisya, bandang alas-2:30 ng hapon nang salakayin ang lugar at matiyempuhan ang mga nakalatag na paputok.

“Kahit malakas o mahina man ang paputok, kailangan naming kumpiskahin kasi mahigpit ang kampanya ng pamahalaang lokal ang pagbabawal sa mga paputok,” pahayag ni P/Supt. Anonuevo.

Itinurn-over ang mga paputok sa MPD-Bomb Disposal Unit.