Pulis-Maynila inireklamo ng hulidap
MANILA, Philippines - Hindi pa nga sumusuko ang 8 pulis-Maynila na nakatalaga sa Anti-Carnapping Unit ng MPD na inireklamo ng hulidap ng isang negosyanteng Pakistani national ay isa na namang pulis ng Manila Police District (MPD) ang inireklamo rin ng hulidap ng isang 56-anyos na negosyante.
Sa inihaing reklamo ng biktimang si Edgardo Sy, ng Grace Park, Caloocan City laban kay PO1 Marlon San Diego, nakatalaga sa MPD-Station 11 na kinuha umano ng pulis ang P1,700 cash sa kanyang bulsa at inutusan pa na mag-withdraw sa ATM naganap kahapon ng alas-2:00 ng madaling araw sa Escolta St. Binondo, Maynila.
Ayon sa biktima na siya ay sinita ni PO1 San Diego nang makita na wala siyang suot na helmet habang nagmomotorsiklo at kinotongan ng nasabing halaga.
Ayon naman kay C/Insp. Arsenio Riparip, hepe ng MPD-GAIS, na aalamin nila kung may katotohanan ang alegasyon sa pamamagitan ng komprontasyon sa Lunes.-Ludy Bermudo-
- Latest
