Totoy nilamon ng lupa

MANILA, Philippines - Isang 4-anyos na batang lalaki ang nasawi habang ang tatlong miyembro ng kanyang pamilya ang nasugatan sa naganap na landslide sa Brgy. Balensong, North Upi, Maguindanao.

Nababalutan ng putik nang marekober ang buong katawan ng biktima na kinilalang si Ranin Tuniakao.

Ang  magulang na sina Wilfredo Tuniakao, Nerissa at ang kakambal ni Ranin na batang babae ay sugatang nailigtas.

Sa naantalang ulat ng Office of Civil Defense Central Mindanao, naganap ang insidente noong Miyerkules bandang alas-8:00 ng gabi matapos na kumain ng hapunan ang mga biktima.

Sa gitna ng malalakas na pagbuhos ng ulan ay big­laang gumuho ang bundok na tumabon sa bahay ng pamilya Tuniakao na nasa ibabang bahagi nito.

Pinaniniwalaan namang lumambot ang lupa sanhi ng ilang araw na mga pag-ulan sa lugar na siyang nagbunsod sa landslide.