Driver todas sa ex ng lover

MANILA, Philippines - Naging mitsa ng buhay ng isang truck driver ang pakikipagrelasyon sa isang ginang na hiwalay sa asawa matapos na siya ay saksakin ng dati nitong mister kamakalawa ng gabi sa Port Area, Maynila.

Ang biktima na hindi na umabot ng buhay sa Gat Andres Bonifacio Hospital ay kinilalang si Cresencio Milagrosa Jr., 53, ng  Block 17, Zone 14, Baseco Compound, Port Area, Maynila sanhi ng  tinamong saksak sa kaliwang dibdib.

Ang suspek ay kinilalang si Jerson Lastina, tinatayang nasa ng 55-60 ang edad, may taas na 5’7” hanggang 5’9” at nakatira sa Cavite.

Sa ulat dakong alas-11:00 ng gabi nang mamataan ng suspek ang biktima na hawak nito ang kamay ng dating misis na si Lyn Tarrago habang naglalakad mula sa isang grocery sa Port Area, Maynila.

Pagdating sa  madilim na lugar ay bigla na lamang nilapitan ng suspek ang biktima at pinagsaasaksak.

Nabatid na nakipaghiwalay si Tarrago sa suspek at sumama sa biktima.