9 bilanggo umeskapo

MANILA, Philippines - Umeskapo ang siyam na preso sa Tinagis Penal Farm sa Pili, Camarines Sur kahapon ng madaling araw.

Sa ulat ng Police Regional Office V (PRO-V), kinilala ang mga pinaghahanap na pugante na sina Rolly Cabaltera, Roland Negrido, Juan Polidario, Gilford Embile, Muriel San Joaquin, Richard Tele, Erwin Capuz, Eugene Brutas at Cea Kalim.

Naganap ang pagtakas ng mga nasabing preso sa Tinangis Penal Farm na matatagpuan sa Brgy. Tinangis, Brgy. San Jose, Pili, Camarines Sur dakong alas-2:15 ng madaling araw.

Sinamantala umano ng mga preso na makalingat ang kanilang mga bantay ng isagawa ang pagpuga.

Kaagad namang bumuo ng tracking team ang mga awtoridad upang tugisin ang naturang mga preso at inalerto rin ang komunidad dahil mapanganib at armado ang mga tumakas na preso.

Iniimbestigahan na ang kasong ito at inaalam na rin ang pananagutan ng mga jailguard sa naganap na pagtakas.