Mikee Mojdeh nagparamdam agad sa Bangkok
Nasungkit ni Mikhael Jasper "Mikee" Mojdeh ang unang medalya ng Swim League Philippines (SLP) sa 2024 Asian Open School Invitational (AOSI) Aquatics Championships Bangkok na ginaganap sa Assumption University Aquatic Center (ABAC) sa Suvarnabhumi Campus sa Bangkok, Thailand.
Nakasiguro ng podium finish si Mojdeh nang sikwatin nito ang tanso sa boys’ 8-year 50m breaststroke kung saan nagsumite ito ng 51.05 segundo.
Ito ang unang international tournament ni Mojdeh kaya’t hindi maitago ang saya nito na makapagbigay ng karangalan sa bansa sa kanyang murang edad.
“It’s really an honor to represent our country in an international tournament. But winning a medal in my first international competition is just overwhelming. I’m so happy that I was able to contribute to the team,” ani Mojdeh.
Si Mojdeh ang bunsong kapatid ni World Junior Championships semifinalist at Philippine national junior record holder Micaela Jasmine.
Inaasahang magdaragdag pa ng medalya si Mikhael Jasper sa kanyang mga susunod na events sa torneong nilahukan ng mahigit 1,000 tankers mula sa iba’t ibang panig ng rehiyon.
Nagdagdag din ng tansong medalya sina Alister Arnaldo, Francis Luke Ebcas at Edgar Allan Uno Naraga sa kani-kanyang age-bands.
Pumangatlo si Arnaldo sa boys’ 9-year 50m breaststroke (45.18) gayundin sina Ebcas sa boys’ 16-year 50m breaststroke (30.35) at Naraga sa men’s 18-over 50m breaststroke (30.33).
- Latest
