Europe training para sa Gilas

MANILA, Philippines - Kung hindi magbabago ang plano at kakayanin ng pondo ay sasailalim ang Gilas sa overseas training sa Europe sa June 10-27 bukod pa sa isang pocket tournament sa Bologna, Italy.

Sa pagbabalik ng Philippine national basketball team sa bansa ay lalabanan naman nila sa tune-up game ang Turkey sa July 1.

“Right now, we’re in the process of obtaining management approval,” sabi ni SBP deputy executive director for international affairs Butch Antonio.  “Coach Tab (Baldwin) will resume practice on May 18 as he called off the Monday sessions when the PBA playoffs started.  Those in the Gilas 24-man pool whose teams have been eliminated (sa Commissioner’s Cup) are now taking a break before reporting for practice.”

Nakatakdang dumating sa bansa si naturalized player Andray Blatche, kasalukuyang nasa Atlanta, sa May 15.

Sa pagkakasibak sa San Miguel Beer sa PBA Commissioner’s Cup ay maaari nang magsanay sa Gilas sina JuneMar Fajardo at Marcio Lassiter.

Ang iba pang nasa Gilas pool ay sina Rain Or Shine’s Gabe Norwood, Jeff Chan at Paul Lee, Calvin Abueva ng Alaska, Jayson Castro, Ranidel de Ocampo, Matt Ganuelas-Rosser, Ryan Reyes, Troy Rosario at Mo Tautuaa ng Talk ‘N’ Text, Greg Slaughter, L. A. Tenorio at Japeth Aguilar ng Barangay Ginebra, Globalport’s Terrence Romeo at Star’s Marc Pingris.  Ang mga non-PBA players sa Gilas 24-man pool ay sina Kiefer Ravena, Mac Belo, Kevin Ferrer, Russell Escoto, R. R. Pogoy, Bobby Ray Parks at Blatche.

Sinabi ni Antonio na magkakaroon ang Gilas ng training camp sa Greece kung saan iginiya ni Baldwin ang PAOK Thessaloniki club noong 2007-08.

Ang asawa ni Baldwin na si Efi ay isang Greek.

Nakatakda ring sumabak ang Gilas sa isang two-day pocket tournament sa Bologna kontra sa Italy, China at Canada sa June 25-26.

Sa first-day pairings sa Bologna tournament ay magtatapat ang Gilas at Italy at maghaharap ang China at Canada sa June 25.

Maglalaban kinabukasan ang mga nanalo para sa championship game at ang mga natalo ay maglalaban para sa third place.

 Nakakuha ang China ng tiket sa Rio Olympics matapos talunin ang Gilas sa FIBA Asia final sa Changsha noong nakaraang taon.

Mamamahala naman ang Italy ng isang Olympic qualifier sa 16,600-seat Pala Alpitour sa Turin sa July 4-9.

Makakasama ng Italy sa six-team qualifier ang Greece, Mexico, Iran, Tunisia at Croatia.

Maglalaro ang Canada sa Manila qualifier sa MOA Arena sa July 5-10 kasama ang France, New Zealand, Turkey at Senegal.