Tagumpay ang Satin Lace

MANILA, Philippines - Inangkin ng Satin Lace ang pangunguna sa 2014 Philracom sponso­red Charity Special Race 2nd Horse Racing Cup no­ong Biyernes ng gabi sa bakuran ng MetroTurf sa Malvar, Batangas.

Si EP Nahilat ang du­miskarte sa Satin Lace na naibulsa rin ang P180,000.00 premyo na ibi­nigay ng Philippine Ra­cing Commission sa na­nalo sa 1,200-metro dis­tansyang karera na ang ki­nita ng karera ay ibibigay sa Manila Police District Press Corps.

Dominado ng nanalong tambalan ang kabu­uan ng karera at kahit si­nikap ng Mahiwaga, Birthday Gift at Freaky na bigyan ng magandang la­ban ang Satin Lace  sa rekta ay buo pa ang ka­bayo para kumawala sa huling 100-metro ng ka­rera.

Ang Mahiwaga na da­la ni Mark Alvarez ang pu­mangalawa sa datingan bago tumawid ang Birthday Gift ni JB Cordova, Freaky ni RC Tanagon at nabugaw sa limang kalahok ang Boundary ni JL Pa­ano.

Paborito ang Satin  Lace para magpamahagi ng P5.50 sa win, habang ang 5-1 forecast ay may­ro­ong P17.00 dibidendo.

Nakasama sa kuminang sa huling gabi ng pis­ta sa ikatlong race track sa bansa ang pagka­panalo ng dehadong Perry’s Prize sa race six.

Kondisyon ang kaba­yong hawak ni LT Cuadra da­hil banderang-tapos ang panalong kinuha ng tambalan sa Handicap Race 8 na ginawa sa 1,200-metro distansya.

Rumemate ang It’s June Again ni KB Abobo pe­­ro hindi na umabot at na­talo sa Perry’s Prize ng kalahating katawan.

Pinakadehadong na­nalo sa gabi ang Perry’s Prize matapos maghatid ng P161.50 sa win at P431.00 sa 2-6 forecast.