MANILA, Philippines - Malubhang nasugatan ang publisher ng lokal na pahayagan matapos itong pagbabarilin ng tatlong lalaki na lulan ng motorsiklo sa Barangay Menien West, bayan ng Sta. Barbara, Pangasinan kahapon ng umaga.
Kinilala ni P/Chief Inspector Ryan MaÂnongdo, spokesman ng Pangasinan PNP ang biktima na si Jaime Aquino, publisher ng Northern Star Magazine.
Si Aquino ay isa sa mga kasamahang akusado ni Pangasinan Gov. Amado Espino sa kasong pagpatay kay Mayor Ruperto Martinez ng bayan ng Infanta noong Disyembre 2012.
Sa police report na nakarating sa Camp Crame, nagbabasa ng diyaryo ang biktima sa waiting shed nang biglang ratratin.
Gayon pa man, nagawang makatakbo ng biktima sa kaniyang sasakyan para kunin ang service firearm pero tuluyan na itong bumagsak ng tamaan ng bala sa likurang bahagi ng katawan.
Sa tala ng pulisya, sinasabing idinawit sina Aquino, Gov. Espino Jr. at isang kongresista sa Pangasinan bilang mga mastermind sa pagpatay kay Martinez.