Clarkson humataw sa Jazz vs Hawks
ATLANTA — Kumayod si Fil-Am Jordan Clarkson ng 30 points sa 116-98 pananaig ng Utah Jazz sa Atlanta Hawks sa kabila ng hindi paglalaro ni leading scorer Donovan Mitchell.
Naupo si Mitchell sa bench dahil sa kanyang sprained right ankle.
Si Clarkson, ang NBA Sixth Man of the Year winner, ang bumandera sa ratsada ng Jazz (7-1) sa fourth quarter kung saan sila nagsalpak ng walong three-point shots para ungusan ang Hawks (4-5).
Umiskor si Trae Young ng 21 points sa panig ng Atlanta.
Sa Miami, naglista si Jaylen Brown ng 17 points sa pamumuno sa anim pang players ng Boston Celtics (4-5) na naglista ng double figures sa 95-78 pagpapalamig sa Heat (6-2).
Sa Phoenix, nagsalpak si Devin Booker ng 27 points at may 19 markers si Landry Shamet mula sa bench sa 123-111 pagtupok ng Suns (4-3) sa Houston Rockets (1-7) para sa kanilang ikatlong sunod na panalo.
Sa Los Angeles, humugot si Shai Gilgeous-Alexander ng 11 sa kanyang 28 points sa final canto at bumangon ang Oklahoma City Thunder (2-6) mula sa 19-point deficit para agawin ang 107-104 panalo sa Lakers (5-4).
Sa Detroit, gumawa si Seth Curry ng 23 points at nagdagdag ng 20 markers si Tyrese Maxey sa 109-98 tagumpay ng Philadelphia 76ers (7-2) sa Pistons (1-7).
- Latest
