Sweep SA Japan
Cignal Co-Champion
MANILA, Philippines - Nakumpleto ng Kobe Shinwa Women’s University ang matamis na sweep matapos ilista ang 25-17, 25-19, 21-25, 25-18 laban sa Petron upang angkinin ang kampeonato sa 2017 Philippine Superliga (PSL) Invitational Conference kahapon sa The Arena sa San Juan City.
Rumatsada si Mariko Fujiwara ng 14 puntos habang umariba si Kana Edamatsu ng 13 hits para pamunuan ang Kobe Shinwa sa panalo.
“We had fun facing your team. We hope you learned something from us the same way we learned something from you,” ani Japanese coach Kiyokazu Yamamoto.
Itinanghal namang co-champion ang Cignal na tumapos ng 2-1 rekord sa final round kabilang ang 25-20, 25-18, 25-22 panalo laban sa two-time Grand Prix champion Foton.
Balanse ang ilnilatag na atake ng HD Spikers sa pangunguna ni Cherry Vivas na may siyam na puntos habang may walo naman si Steph Mercado, pito si Jovelyn Gonzaga at tig-anim sina Janine Marciano at Honey Royse Tubino.
Nasungkit ni Gonzaga ang Most Valuable Player habang ang iba pang awardees ay sina Ces Molina ng Petron (First Best Outside Spiker), Rachel Anne Daquis ng Cignal (Second Best Outside Spiker), Chihiro Fujiwara ng Kobe Shinwa (First Best Middle Blocker), Maica Morada (Second Best Middle Blocker), Chi Saet ng Cignal (Best Setter), Mary Grace Berte ng Foton (Best Opposite Spiker) at Angelique Dionela ng Cignal (Best Libero).
Nagtapos bilang second runner-up ang Petron na may 1-2 rekord habang third-runner-up ang Foton na walang naipanalo sa final round matapos magtamo ng injury ang team captain nitong si Dindin Santiago-Manabat.
Sa classification round, nalusutan ng Generika-Ayala ang Cocolife, 25-18, 26-24, 26-24 para mahablot ang ikaapat na puwesto.
Nagkasya sa ikalimang puwesto ang Asset Managers na nakakuha ng tig-walong puntos mula kina Michele Gumabao at Wensh Tiu.
- Latest
