Marcial susuntok sa quarterfinals
DOHA, Qatar — Sa paghaharap ng dalawang may malalakas na suntok, mas nanaig si Filipino welterweight Eumir Felix Marcial laban kay Youba Sissokho ng Spain sa pamamagitan ng split decision sa huling araw ng preliminaries ng 2015 AIBA World Championships dito sa Ali Bin Hamad Al Attiya Stadium.
Ibinigay ng dalawang judges mula sa Russia at Turkey ang dalawang rounds sa 19-anyos na si Marcial, habang pumanig naman ang Uzbekistan judge sa Senegal-born na si Sissokho.
Nagpakawala si Marcial ng mga mabibigat na suntok para talunin ang 23-anyos na Spaniard.
“Puro kombinasyon ang binato ko at malalakas ang patama ko, akala ko nga nakuha ko lahat ng round. Pero okay lang, ang importante nanalo tayo at buhay ang pangarap natin na maka-Olympics,” sabi ng tubong Zamboanga.
Bubukasan ni light flyweight Rogen Ladon ang quarterfinal round sa pagsagupa kay Dawid Jagodzinski ng Poland, habang makakalaban naman ni Marcialsi World No. 1 Daniyar Yeleussinov ng Kazakhstan.
Tinalo ni Yeleussinov si Marcial sa finals ng nakaraang Asian Championships sa Bangkok, Thailand noong Setyembre.
Kailangan ng dalawang Filipino boxers na maipanalo ang kanilang dalawang laban para makamit ang tiket patungo sa 2016 Olympic Games sa Rio de Janeiro, Brazil.
Bumisita si boxing legend Manny Pacquiao kamakalawa at nangako kina Ladon at Marcial na magbibigay ng P500,000 bonus sakaling maiuwi nila ang gold medal.
- Latest