TAGBILARAN City, Philippines – Pinamunuan nina Emmanuel Comendador at Ruffa Sorongon ang labanan sa 21-kilometer event sa qualifying race ng National MILO Marathon kahapon dito sa Tagbilaran, Bohol.
Nagsumite si Comendaro ng tiyempong 01:16:00. para ungusan sina Elmer Bartolo (01:17:00) at Azlan Pagay (01:17:00).
Ito ang ikalawang pagkakataon na sumali ang 25-anyos na Marine Engineering student ng Philippine Marine Institute sa naturang marathon event mula sa panghihikayat ni coach Jojo Posadas.
Naorasan naman si Sorongon ng 01:33:48 para talunin sina Jennifer Sabella (01:49:08) at Rhodora Oporto (01:50:06).
Tatlong taon nang tumatakbo ang 23-anyos na tubong South Cotabato na si Sorongon.
Dahil sa kanilang mga tagumpay ay nakamit nina Comendador at Sorongon ang premyong P10,000 at tiket para sa MILO National Finals na nakatakda sa Disyembre 7 sa Mall of Asia grounds sa Pasay City.
Nagkakaroon din sila ng tsansang tanghaling MILO Marathon King at Queen.
Ipapadala ng MILO ang hihiranging King at Queen sa Japan para sa isang all-expense paid trip sa 2015 Tokyo Marathon.