Tanghaga

Gitangtang ni Presidente Bongbong Marcos Jr. isip hepe sa kapolisan sa nasud si Heneral Nicholas Torre III niadtong adlaw nga Martes, Agosto 26, 2025. Kalit kaayo ang pagtangtang sa Presidente sa hepe sa kapolisan sa nasud.

Nagkuyog pa ang heneral ug ang Presidente niadtong adlaw nga Lunes dihang gihandom sa nasud ang National Heroes Day. Ang pagtangtang sa heneral adunay petsa nga Agosto 25, 2025 apan gipatuman lamang kini pagka petsa 26 sa Agosto. Buot ipasabot, sa adlaw nga nagkuyog ug misalodar sa Presidente si Torre gitangtang ba diay siya niini. Laina pod sa Presidente, wa gyod magsaba ni Torre.

Sa pagkatangtang sa heneral lainlain ang mga nanggawas nga ispikulasyon. Usa niini ang bangi ni Torre ug ni DILG Secretary Jonvic Remulla tungod sa pagpangbalhin niini sa mga tag-as nga opisyal sa kapolisan nga gihulagway nga demosyon diin apektado si Lt.General Jose Melencio Nartatez Jr. Apan giklaro ni Secretary Remulla nga ang pagtangtang ni Torre pagka hepe sa kapolisan sa nasud mao ang wala pagsunod niini sa mando sa National Police Commission.

Gipun-an ni Senadora Imee Marcos ang sulti ni Secretary Remulla pero iyang gidugangan sa pag-ingon nga nanghambog na si Torre sa iyang mga kaklase nga magpapili kini pagka presidente o bise presidente sa nasud basi sa iyang mga nadungog. May pagka marites pud diay ni si Senador Imee Marcos. Midako napod ang ulo sa heneral nga gani kun molihok mura na og Presidente sa nasud.

Nagtuo ko nga aduna pay mas lawom nga hinungdan sa pagtangtang ni Torre. Kun unsa man kini, ang Presidente lang ug ang mga nagtuyok kaniya ang nasayod. Mabaw ra kaayo ang rason nga gitangtang si Torre kay wala mosunod sa Napolcon.

Giputol ba ni Presidente Bongbong Marcos Jr. ang ulo ni Torre kay midako na kini? O ba kaha nahadlok ang Presidente ni Torre sa umaabot nga 2028 nga bugnong lugaynon. Hangtod ang Malakanyang dili motugan sa tinuod, magpabiling tanghaga ang pagkatangtang ni Police General Nicholas Torre III.